ዶ/ር አብይን በእውቀት እንወቅ

9/24/2019

ዶ/ር ዘላለም እሸቴ

የኢትዮጵያ ነገር መላ እንደሌለው፤
አምላኳ አወቀላት ጉዳዩ ሌላ ነው።

ብርሃን ፈነጠቀ ዶ/ር አብይ መጣ፥
ኢትዮጵያን ሊታደግ እርሱ እንቅልፍ አጣ፥
ሁሉም ደገፈና አንድ ላይ ሰልፍ ወጣ፥
ልናርፍ ነው ብሎ ከነበረን ጣጣ።

ቃሉ የሚጣፍጥ የሌለው ወደር፥
ትህትናው ግሩም ልዩ ከምድር፤
ፅናቱ የሚገርም ደግሞም እይታው፥
ድፍረቱ ትጋቱ እጅግ የሚደንቀው።

ጠላቱ እያደር እየበዛ ሲሄድ፥
ወደድኩህ ያለውም ሊያወጣው ከመንገድ፤
ከወዲህ ከወዲያ ሁሉም ሲጎትተው፥
ስምም እያወጣ ቢጎነታትለው፤
ዝም ብሎ ነጎደ አልተነቃነቀ፥
ሁሉንም እያየ አውቆም እያወቀ።

የኢትዮጵያ ነገር መላ እንደሌለው፥
አምላኳ አወቀላት ጉዳዩ ሌላ ነው፤
ጠላቶቿ በዙ እጅግ ጨከኑባት፥
ስለዚህ ወረደ አምላክ ሊፈርድላት፥
ምድር ዝም ትበል ይታይ ሲለይለት።

ትዕግስት አይጠቅመንም ቶሎ ያልቃልና፥
ተስፋም አይረዳንም ስጋት ያንቃልና፤
ይልቁንስ እንይ የማይታየውን፥
በእውቀት እንወቅ አይለፈን ይህ ቀን።

4 Comments

Berhanu Mengistu

9/24/2019 08:51:43 am

Thanks for sharing.
The challenge for me on making comments on a media like this is that the communication is one way, no engagement in any form of dialogue.
I like the poem, just on target, but I have a question on the last four lines, the concluding stanza.
Thanks again for sharing and inspiring.

Lulsegged Abebe

9/24/2019 10:55:48 am

ዶ/ር ዘላለም፣ ጥሩ መልእክት የያዘ ግጥም ነው፤ ፕሮፌሰር ብርሃኑ የሰጠውን አስተያየት እጋራለሁ፡፡ በተለይ የሚከተሉት ሁለት ስንኞች፡

"ትዕግስት አይጠቅመንም ቶሎ ያልቃልና፥
ተስፋም አይረዳንም ስጋት ያንቃልና፤"

ትዕግስት አያልቅም፤ እየዳበረና እያደገ የሚሄድ ነው፤ በተለይም በእምነት እይታ ስንመለከተው፡፡ ሃሳብን ከማጎልበቻ መንገድ አንዱ ነው ብዪ አምናለሁ፡፡ ተስፋም እንደዚሁ፡፡ በትዕግስት ሰዎች ራሳቸውን እንዲመረምሩ ዕድል ያገኛሉ፡፡ በሂደት ወደ መቻቻል፤ መግባባት፤ ያደርሳሉ ፡፡

Zelalem Eshete

9/24/2019 11:06:12 am

በኢትዮጵያ በየዕለቱ የሚካሄደውን ድራማ ብቻ እያየን ብንታገስ ሩቅ ርቀት አንሄድም። ተስፋም እንደዚሁ። ትዕግቱም ያልቃል፥ ተስፋውም በስጋት ይታነቅና ይመነምናል። ግን የማይታየውን የኢትዮጵያ አምላክን ብናይና በዚህ እውቀት ነገሮችን ብንተረጉም፥ እውነተኛ ትዕግስትና እውነተኛ ተስፋ ኖሮን ዳር ያደርሰናል ለማለት ነው። አስተያየታችሁን ወድጀዋለሁ። ሁለታችሁንም እግዚአብሔር ያክብርልኝ።

Dereje kifle

9/25/2019 01:03:10 am

ተስፉውን በትግስት መጠበቁን ባልጠላሁት ነበር:: እንደ ጎርቫቾቭ መስሎኝ ነበር እንዳይሉኝ ብዬ ባልፈራ

የዘላለም እይታዎች